اسعار الاعلانات الممولة على الفيس بوك

 أسعار الإعلانات الممولة على الفيس بوك

عشان تعرف أسعار الإعلانات الممولة على الفيس بوك محتاج تعرف إزاي الفيس بوك بيحسب التكلفة. وهنا لازم تعرف إن في نوعين من التكلفة:

• 1- التكلفة الإجمالية للحملة الإعلانية.
• 2- التكلفة لكل نتيجة.

التكلفة الإجمالية هي الفلوس اللي هتدفعها في إعلانك من أول ما يبدأ يشتغل لحد ما يقف. أما التكلفة لكل نتيجة هو سعر النتيجة اللي هتحصل عليها. يعني لو إعلانك هدفه رسائل فا هو سعر الرسالة الواحدة بالنسبة للإعلان. وهنا لازم تعرف إيه اللي بيحدد السعر دة وليه ممكن يزيد أو يقل.

• جودة التصميم:

لأن الفيسبوك بيهتم بجودة الإعلانات اللي هيوصلها للعميل وبيهتم إن المستخدمين يستمتعوا بوقتهم على الفيس بوك، فا جودة تصميمك وسهولته بتفرق جدًا في تحديد أسعار الإعلانات الممولة على الفيس بوك.

• جودة المحتوى المكتوب:

زي ما جودة التصميم مهمة، جودة المحتوى المكتوب كمان مهمة إن لم تكن أهم. وعشان الفيس بوك بيهتم جدًا بجودة الإعلان فا كان من ضمن أحدث تعديلات هو تعديل يخص عدد الحروف المُستخدمة في الإعلان إنه لا يتعدى ال280 حرف. ولكن دة مش معناه إن لو إعلانك أطول هيترفض، ولكن كل ما كان الإعلان أقصر النتائج هتكون أفضل ودة عشان يحافظ على تجربة المستخدم وإنه ميحسش بالملل أو التوهة وهو بيقرأ إعلانك. عشان كدة جودة المحتوى عنصر أساسي ومهم في تحديد أسعار الإعلانات الممولة على الفيس بوك.

• الإستهداف الصحيح:

عشان تقدر توصل لأقل أسعار للإعلانات الممولة على الفيس بوك، محتاج تتأكد من إستهدافك وإنك مختار الفئة اللي عايزها فعلًا تشوف إعلانك. وعشان تفهم دة أكتر خلينا نتخيل لو إنت بتعلن عن منتجات للعناية بالبشرة للسيدات وإستهدافك كان للرجال! أكيد محدش فيهم هيشتري أو يتفاعل مع إعلانك إلا قلة قليلة منهم ودة هيعلي التكلفة جدًا. عشان كدة الإستهداف كل ما كان صح ومحدد كل ما كان له نتائج أحسن وتكلفة أقل.